Herzlich willkommen auf der neuen Homepage


Vorwärts Marsch - oder "mir gönge online!"
Härzlich willkomme uf dr neue Homepage vo dr Rotstab-Clique Lieschtel

Im Mai 2011 han ich die ehrevolli Verantwortig für die traditionelli und ältischti Fasnachtsclique vo Lieschtel dörfe überneh. Mittlerwyle sy die sogenannte 100 Däg vergange und ich cha scho mol zruggluege!
D Rotstab het wie jedes Johr dr Lieschtler Banntag am Sunntig ydrummlet und -pfyffe. In däm Johr, wo alles e chli spot isch, sy scho gli d Summerferie cho. Au dört träffe mir eus, doch emol ohni Instrumänt. E sehr e interessante Obe hei mir mit em Schnitzelbankvortrag vom Peperoni verbrocht. D Bierwanderig – wo schlicht und eifach isch, aber uf kei Fall strychbar – isch wie immer e gmüetlige und luschtige Obe im Wald gsi. Dr dritti Aalass im Programm isch quer dur Mittel- und Nordamerika gange – als wäre mir grad an däm Oobe uf dr Waldweid mitgreist – eifach mit Diashow!
Jetz luege mir vorwärts und mittlerwyle sy mir scho wieder flissig am Üebe. Schliesslich erwartet eus s negscht Johr ganz vill. Agfange mit em regionale Pryysdrummle und -pfyfe. Denn stoht scho euses begehrte Rotstab-Cabaret uf em Programm. D Fasnacht wei mir natürlig gar nid misse und freue eus au scho riesig druff. Nach dr Fasnacht gohts wie am Schnüerli wyter – mir hei e grosses Fescht vor eus. D Rotstab-Clique isch – zämme mit divärse Lieschtler Fasnachtsclique – Organisator vom Zentralschwizerische Tamboure- und Pfyferfescht.
Doch langsam, eso schnäll gohts hoffentlich nid, obwohl d Vorbereitige scho im Gang sy. Dir dörfet zerscht emol eusi neui Homepage inspiziere und studiere. In mänge Stunde isch die tolli Syte entstande. Danke villmool an die flyssige Gschtalter und Schryber. Uf eusere Syte gits vill Neus z finde. Über eusi verschiedene Abteilige und natürlig über die ganzi Rotstab findet dir interessanti Informatione und Gschichte. E neui Sparte isch "Weisch no?" Au mit eusem "Stroossewüscher" bringe mir neue Wind dry. Jede Monet gits dört neui Gschichte.
Ich hoff, ich ha euche Gwunder gstüpft und wünsch euch vill Spass bim lääse, stuune und lache uf eusere Homepage.

Carol Zumbrunnen-Schweizer
Präsidentin Rotstab-Clique Liestal

 

Wie gefällt Ihnen unsere neue Homepage? Ihre Meinung interessiert uns. Schreiben Sie einen Kommentar

NEWS

26.12.2023

Cabaret Tickets 2024

COUNTDOWN

Noch

bis zur Fasnacht 2024

Rotstab-Clique | 4410 Liestal | info@rotstab-clique.ch